Inicio » Historia

Historia

Aínda que en Cacheiras xa se xogaba ao fútbol desde os anos 40 do pasado século, a fundación da Sociedade Deportiva Cacheiras non se produciría até o ano 1977. O primeiro partido oficial xogaríase no campo dos nosos veciños de Praíña, saldado cun triunfo por 1-3. Esa tempada inicial remataría co campionato da terceira rexional e o ascenso á potente segunda autonómica da época, a chamada Liga do Sar. Son eses anos un período de numerosa afección, con grandes entradas no campo da Cañoteira e enchendo autobuses para acudir a cada desprazamento, cumprindo boas tempadas tanto en Liga coma en Copa (a asignatura históricamente pendente do clube) cun equipo que se vai gañando fama de potente dentro da comarca.

O Cacheiras remata nas posicións altas da táboa e chega ás últimas roldas copeiras, caendo un par de anos seguidos co Dubra, a “besta negra” do Cacheiras neses tempos. O impulso inicial vai decrecendo pouco a pouco ata o primeiro descenso, na tempada 82/83. Un retorno inmediato na seguinte campaña e un par de anos máis de transición, co bo prólogo do paso do equipo xuvenil pola Liga Galega na tempada 85/86, abren camiño á mellor época do clube.

xuvenisligagalega8586

Coa chegada de José Luis Iglesias e unha boa camada de xogadores procedentes da canteira do Vista Alegre santiagués, o Cacheiras conquire o campionato de segunda na tempada 86/87 e alcanza por primeira vez a primeira rexional, aínda que continuando coa súa mala sorte copeira: perde a final da Copa do Sar no último minuto co San Mamede, outro conxunto históricamente “maldito” para o Cacheiras. Tras unha boa tempada de debut na nova categoría, na que se repite a maldición copeira voltando a caer no último minuto da final ante o Noia, o Cacheiras consegue o subcampionato na 88/89, caendo na segunda rolda da promoción tras unha estrana eliminatoria contra o San Lázaro lucense. O ascenso á Preferente chega na 89/90, cun novo subcampionato e compartindo éxito co eterno rival do concello, a S.R. Calo.

9192preferente2

O debut na Preferente Norte sáldase coa permanencia, conquerida de forma rocambolesca grazas a un partido repetido co Noia xogado coa tempada rematada e que o Cacheiras gañaría por 0-1. Sen embargo, a seguinte campaña estaría marcada polos problemas dende o comezo e a aventura do clube na Preferente remata co descenso de categoría. Na tempada 92/93 o Cacheiras alcanza un acordo de colaboración co Compostela, recollendo os xogadores da súa canteira, pero o proxecto rompe bruscamente no verán seguinte ao non haber ningún candidato á presidencia do clube e ser este entregado á Federación. Son dous anos sen a SD Cacheiras no fútbol federado, ata que na tempada 95/96 o clube comeza de novo na terceira rexional.

8687-campeon2

Tras tres anos e non poucas dificultades chega o ascenso á segunda rexional, onde o Cacheiras xa se vai asentar nos seguintes anos, accedendo de cando en vez á categoría superior. O ascenso da tempada 03/04 duraríalle dous períodos ao clube, e tras varios intentos infructuosos, incluíndo algunha promoción perdida, volve a conquerirse o ascenso co subcampionato da 11/12. Unha mala tempada no retorno á primeira autonómica devolve ao Cacheiras á segunda autonómica, onde compite esta tempada no grupo V.

Histórico:

  • 2 tempadas en Preferente.
  • 7 tempadas en 1ª Autonómica.
  • 26 tempadas en 2ª Autonómica.
  • 6 tempadas en 3ª Autonómica.

Palmarés:

  • 2 campionatos de 3ª Autonómica (77/78, 99/00)
  • 2 campionatos de 2ª Autonómica (86/87, 03/04)
A Primeira Directiva Todos os presidentes
Luciano Blanco Martínez Luciano Blanco Martínez (1977 – 80)
Gerardo Noya Nogareda Luciano Castro Barreiro (1981 – 11 julio)
Adolfo Francos Louro Sabino Coelho Baluja (1981 – 5 septiembre)
Enrique Raviña Valdés Adolfo Francos Louro (1982)
Ramón Valiño Bascoy Manuel Rama Lesta (1983)
Santiago Ferreira Aldrey Alberto Coelho Amo (1983 -88)
José Gómez Espiñeira Armando Blanco Martínez (1988 – 90)
Antonio Blanco Seoane Luis Ferreira Aldrey (1992)
Guillermo Blanco Seoane José Luis García Rego (1993)
Ramón Gómez Espiñeira Carlos Sonería Romero (Gestora) (1994)
Jesús García Rivas Eugenio Rilo Iglesias (1995 – 2001)
Fernando Garabal Vázquez Manuel Rodríguez Lueiro (2002)
Albino Pena De la Torre Carlos Martínez Blanco (2003)
Armando Blanco Martínez David Pesoga Cao (2004)
Eugenio Rilo Iglesias Manuel Rodríguez Lueiro (funcións, 2005)
Eduardo Manzano Manuel Sánchez Raices (2006 – 2013)
Jesús Fuentes Antelo  José Manuel Fernández Seoane (2013 – Actual)
José Manzano Sabas
Utilizamos cookies propias y de terceros para mejorar la experiencia de navegación. Al continuar con la navegación entendemos que se acepta nuestra Política de cookies. Más Info | Acepto